ပြည်ထောင်စုဝန်ကြီး ဦးအောင်မျိုးမင်း သြစတြေးလျ ပြည်ထောင်စုလွှတ်တော်ရှိ မြန်မာ့ဒီမိုကရေစီမိတ်ဆွေ လွှတ်တော်ကိုယ်စားလှယ်များအဖွဲ့နှင့် တွေ့ဆုံ

သြစတြေးလျနိုင်ငံသို့ရောက်ရှိနေသည့် အမျိုးသားညီညွတ်ရေးအစိုးရ၊ လူ့အခွင့်အရေးဆိုင်ရာ ပြည်ထောင်စုဝန်ကြီး ဦးအောင်မျိုးမင်းသည် ၂၀၂၃ ခုနှစ်၊ မေလ ၁၀ ရက်နေ့ ညနေပိုင်းတွင် သြစတြေးလျ ပြည်ထောင်စုလွှတ်တော်ရှိ မြန်မာ့ဒီမိုကရေစီမိတ်ဆွေ လွှတ်တော်ကိုယ်စားလှယ်များအဖွဲ့နှင့် လွှတ်တော် ကော်မတီခန်းမတွင် တွေ့ဆုံခဲ့ပါသည်။ ဤ မြန်မာ့ဒီမိုကရေစီမိတ်ဆွေများအဖွဲ့ကို ပြည်ထောင်စုလွှတ်တော်ကိုယ်စားလှယ် ၄၂ ဦးဖြင့် ဖွဲ့စည်းထားပြီး အထက်လွှတ်တော်၊ အောက် လွှတ်တော် ဥက္ကဌများအပါအဝင် သြစတြေးလျနိုင်ငံရေးတွင် ထင်ရှားသူ ဆီနိတ်တာများ၊ ပြည်သူ့ကိုယ်စားလှယ် အများအပြားပါဝင်ကြပြီး မြန်မာနိုင်ငံရှိ ပြည်ထောင်စုလွှတ်တော် ကိုယ်စားပြုကော်မတီနှင့်လည်း ထိတွေ့ဆက်ဆံမှုများ တည်ဆောက်ထားပြီးလည်း ဖြစ်ပါသည်။ ထိုအစည်းအဝေးတွင် Mr. Peter Khalil MP (Federal Labor Member for Wills) က ပထမဦးစွာ ကြိုဆိုနှုတ်ခွန်းဆက်စကား ပြောကြားပြီး Senator Dean Smith (Liberal Senator for WA) က ဤ အစည်းအဝေးတက်ရောက်လာကြသည့် မြန်မာ့ဒီမိုကရေစီမိတ်ဆွေများအဖွဲ့ဝင် ပြည်ထောင်စုလွှတ်တော်ကိုယ်စားလှယ်နှင့် မိတ်ဆက်ပေးပါသည်။ ထို့နောက် ပြည်ထောင်စုဝန်ကြီး ဦးအောင်မျိုးမင်းက လက်ရှိ မြန်မာ့အရေးနှင့်ပတ်သက်ပြီး အသိပေး တင်ပြကာ ရင်းနှီးပွင့်လင်းစွာဖြင့် အပြန်အလှန် ဆွေးနွေးခဲ့ကြပါသည်။ Ms. Zoe Daniel MP (Federal Member for Goldstein) က ဤ ညှိနိုင်းဆွေးနွေးပွဲကို ဦးဆောင်ပေးခဲ့ပြီးနောက် Senator Jordon Steele-John (Greens Senator for WA) က အစည်းအဝေး၏ အပိတ်အမှာစကားကို ပြောကြားခဲ့ပါသည်။ ဤ တွေ့ဆုံပွဲသို့ လူ့အခွင့်အရေးဆိုင်ရာဝန်ကြီးဌာန၊ ဒုတိယပြည်ထောင်စုဝန်ကြီး ခွန်းဗဟန်းထန်၊ သြစတြေးလျနိုင်ငံဆိုင်ရာ ကိုယ်စားလှယ်ရုံးမှ တာဝန်ရှိသူများနှင့်အတူ ဒီမိုကရက်တစ်မြန်မာ့အသံ၏ အမှုဆောင်ညွန်ကြားရေးမှုး ဦးအေးချမ်းနိုင်လည်း တက်ရောက်ခဲ့ပါသည်။