၂၃ ကြိမ်မြောက် ကယန်းအမျိုးသားနေ့တွင် အမျိုးသားညီညွတ်ရေးအစိုးရ လူ့အခွင့်အရေး၀န်ကြီးဆိုင်ရာဌာန ဒုတိယပြည်ထောင်စု၀န်ကြီး ခွန်းဗဟန်းထန် ပြောကြားသည့် မိန့်ခွန်း

Kanaǐ daò̌ taû̌lai Kayǎnphao mô̌nnû (23)blan akaǔ, Kayǎnphao mwaǐ a aò dô̌ Katan sû̌kǎnkaǔ dò taû̌lai dô̌ ngòn sû̌kǎnkaǔ pǔpra, aòsaò aòma, aòhai aòbaǔ ba thayǎn saô dô̌ tacaû̌ta-ǒn akaǔ pǔpra saôka, thayû̌ kwî̌htan ba dò, aòpaô̌syûn Kayǎnphao mô̌nnû dô̌ tathanaò akaǔ nè.

Kayǎn swî̌lǎn khû̌cû̌ lahan nu, cwaǐdò dô̌ ngaò̌hti ngaò̌rwî̌kaǔ aò (Pyu, Thè̄ , Kǎnyan) swî̌landau (3) raû̌ akaǔ, aò dô̌ Kǎnyan swî̌lǎnkaǔ lan dò, lǎ aî̌ rî̌dò Katan sû̌kǎn cô̌ aòhtan mò̌ hǎ (Kanaǐ pa ká dó Katan sû̌kǎn) taû̌lai rî̌kaò̌ dô̌ pa kalǎn aò kanaǐ ǔ swî̌lǎn laraû̌ preǐ. Dòthǎ cwaǐdò ngaò̌hti ngaò̌rwî̌kaǔ aònu, Kayǎn swî̌lǎn lahan mè, rî̌dò Katan sû̌kǎn naû̌ talǔtalwa khein, pabloncǔ dô̌ aòlǔ aòlwa taò̌ Karenni kǎnkaǔ aò Karenni swî̌lǎn kaǔ laraû̌. Kayǎnphao lahan tahǔ tangaò̌ nu mè, dô̌ Karenni aphonkaǔ, Pakaû̌ swî̌lǎn aphon, Pa-au swî̌lǎn aphon lahan tamangaò̌ nu, thalyû̌ncǔ aò (75) yakhau nu usû ba tha-ǔ. Cwaǐdò-ǔ Kayǎnphao lahan mè, lǎ nein 1875, june lǎ (21) daò̌ , Engle acǒya dò Cahwǎ Mǐntǒnmǐn rǎ, phîlan tamanǎn Karenni kǎn dò  talǔtalwa aòtaò̌ kǎn lakǎn khein nulè̌, aòbloncǔ nirǔ narǎ dò kǎru Karenni swî̌lǎn lahan mwaǐ ( Laò̌kǎn, Kayò̌, Manumanaw , Yǐntalè̌ , Pakǔ, Gebar ) lahan dô̌ tanirǔ nirǎ kaǔ.

Pralau swî̌lǎn laraû̌ tathamyû̌n mè mwaǐ tamangaò̌, lilaǐ, tahtǒn ta-aòcein aòklôn daleǐn dò, ka madauhtan hǒnhtan nu, ayè̌dau nè. Dô̌ ngaò̌hti ngaò̌rwî̌kaǔ nu, Kayǎnphao lahan lilaǐ arîkaò̌ mè, mwaǐ Kyè̄yè̄ li , blǎnmè pra acǎn cô̌ aò . Lǎ nein (100) san akaǔ, mahtanyaò̌ dò sò̌n-i aò Latin li numè, ba maprî̌pran mahtan badau mò̌.

Makanu, aò dô̌ kǎn (4) kǎn akaǔ Kayǎnphao khaunǎ lahan mwaǐ, Thaplaò kǎn khaunǎ lahan, Karenni (laò̌kǎn) kǎn khaunǎ lahan, Pakaû̌ kǎn khaunǎ lahan, Mandalay kǎn khaunǎn lahan, dòthǎ Kayǎn swî̌lǎn (4)raû̌ mwaǐ Kayǎn kangan, Kayǎn kadao, Kayǎn lahtan, Kayǎn kakhò̌n khaunǎn lahan, cô̌kamò̌ Kayǎn swî̌lǎn tayû̌talan bathá khaunǎ lahan mwaǐ Budda cabwôndau lahan, Catholist Bǐsudau lahan, Bǎnkhan Bǐsudau lahan, Kǎnkhwan khaunǎ lahan, phǔ bweca khaunǎ lahan pablon dò pracyan tarai tacǔ tasaikwan aphon lahan mwaǐ, Kayǎn mônthǎ pati, Karenni swî̌lǎn pǔraû̌ ka lǔlwa da yǐ phonrî̌kaò̌  (ကလလတ), KNG, MTA shwe pyi ě aphon khaunǎn lahan nu, mahtan talantaǐblondau dô̌ Karenni (laò̌kǎn) kǎn, Dimawso weinmôn, Kyālǎ dǒn beǐ, nein 2000 , April lǎn (8/9/10) daò̌ khein, nithû nirwaǐ dô̌ kangǎ nǎnkhû̌ dò malanklan da talanklan (3) klan.

(1) Prî̌pran raò́htan sò̌n-iyaò̌ Latin Engle liphlon dò ka sò̌n-i dò dô̌ Kayǎnphao lilai.

(2) Kayǎn khû̌cû̌kaǔ aò, swî̌lǎn (4)raû̌ mwaǐ, Kayǎn kangan, Kayǎn lahtan, Kayǎn Kadao , Kayǎn kakhò̌n, swî̌lǎn (4) raû̌ nu, kakranblon nǎnmyan dô̌ Kayǎn laraû̌ hò .

(3) Malanklan thǎ Kayǎnphao pǔpra nǎnkhû̌ Kayǎn kǎnkhwan.

Ǔkhaucǎ, Kayǎnphao acǔ akhan mwaǐ lilaǐ tahtǒn mèrî, sû̌kǎn nǎnkhû̌ mèrî, Kayǎnphao talataǐblondau arî̌kaò̌ lablan akaǔ, Kayǎnphao pǔpra mahtan bloncǔ taphei tama ǔkaǔ khaucǎ, nein 2000 , April lǎ (10) daò̌ mè, malanklan lablanhtai dò Kayǎnphao mô̌nnû preǐ. 

Cwaǐdò malanklan htan Kayǎnphao mô̌nnû udaò̌ taû̌ kanaǐ mwaǐ Kayǎnphao mô̌nnû nu, htǔ Kayǎnphao nǎnkhû̌ ngaudau prîdau mô̌nnû arî , Kayǎnphao pǔpra ta-aòblon aòdwǎn da , tatò̌nkhau tò̌nbá mô̌nnû lanû nu, taû̌dô̌ hankhau aòleǐn , Kayǎnphao pǔpra ba theingǎ dò ba kranklôn rahǎnyû̌ thayǎn nu, thayû̌ taihyû̌n ba ka ǔ. 

Kanaǐkhein nu, Kayǎnphao lahan mè, cwaǐdò hankhau kaphrî̌ kacòn akaǔ, aò ba dô̌ kǎn (4) kǎn ta-u tapaô̌khau kalǎ mwaǐ Thaplaò kǎn balan, Karenni  (laò̌kǎn) kǎn kakhyû̌, Pakaû̌ kǎn bahtaò̌, Mandalay kǎn Naypyidaw kaǔ. Dô̌ nein 2020 kakhyû̌ cwaǐdò ciròn akaǔ aò nu, Kayǎnphao mè, laǒlaǒ aò da pra ( 2 theǐn dò 3 theǐn) kacôn nu, theiba tha-ǔ.

Kayǎnphao lahan nu, madau malû̌ dò rahǎnyû̌ thayǎn nǎn swî̌lǎn khû̌cû̌ taphei tama dò kanaǐ nulè̌, nǎn lilaǐ, tahtǒn tanwî , tahǔ tangaò̌ lahan nu, aò cein aòklôn dô̌ hankhau lǎkhau da taû̌ kanaǐ nu, theiba pǔpra hô̌. Marǎ dô̌ pa aòcein aòklôn da tha-ǔ nu, mwaǐ preǐ Kayǎnphao pǔpra aòbloncǔ dò aò dwǎn aòpeǐn khaucǎ mè, thayû̌ tai ka ǔ. Dô̌ lilaǐ tadauhtan hǒnhtan numè, kanaǐ Kayǎn lilaǐ nulè̌ arî̌ sû̌kǎnblon sû̌kǎnphao acǒya nu, malanklan yaò̌ htaû̌, kanaǐ mè, dô̌ Kayǎn kǎnkaǔ aò thǎnǎntaò̌ kyòn lahan dò Kayǎnphao aò dô̌ kǎru acǒya kyòn lahan nu, malǔ ba thayǎn.

Makaǐdò naû̌ ba da tha-ǔ nu, mahta dô̌ tama pǔklan, aphon pǔphonkaǔ khaunǎ lahan, pa maô̌phǎ nǎndau ciprǎ lahan htoūkhòn htoū-ǎ , mahtan ba khaucǎ, makaǐ aka cô̌ htǔ ninwǎ mè, pa swî̌lǎn phaoyû lahan, ba kranklôn mahtan leǐ mò̌.  Pa akhaunǎ lahan mahtan ba hô̌ pa hyûn ǔmǎ karwî̌ hô̌ khaucǎ, pa ba laicǔ dò mahtan lailaǐ hyûn ǔmǎ dao khaucò̌n dò, taû̌ pa ka-usû ba aphaò̌ athā kada nu, pa nita aò pǔpra. Pa Kayǎnphao nǎnkhû̌ tama nu, cô̌ mwaǐtaò̌ bǎ khaunǎ lahan dò pra nita aò lahan tama hò, ǔ mè, pa Kayǎnphao laǒ aò dô̌ sû̌kǎnkaǔ sû̌kǎnkwan pǔpra cwaǐdò mada, tama pǔraû̌, kalǎn pǔkaǔ nu, ba theingǎ malai ba mò̌ nè. 

Kanaǐ dô̌ pa Katan kǎnkaǔ nikǎ khanba takaraǐ lahan khaucǎ, pa ta-aòbloncǔ dò tadwǎn tapeǐn nu, makaǐ cô̌ kaǐ cô̌ pyǎ mè, ba theinǎn rwaǐbyan nu, thayû̌ taihtan ka ǔ. Lapá numè, pa Kayǎnphao lahan nu, dô̌ sû̌kǎn nǎnkhû̌ tama mèrî, swî̌lǎn khû̌cû̌ tama mèrî, makaǐ kanaû̌ bábwaǐ sû̌kǎn tabanaû̌ dò sû̌kǎnphao tabanaû̌ lahan mè, ba mablon nirǎ , khǎlai kangǎ cô̌kǎmò̌, ba saipaǐ htan leǐn bloncǔ pǔwaǐ swî̌lǎn khû̌cû̌ lahan , mwaǐ pra phānphi sû̌kǎn takrau tayaò̌, ba deinbá yákaǐ pralau tabanaû̌ aò-á pǔdaò̌ pǔha mwaǐ cīánáshyin pra lacòn mè, ta ayè̌ba dau tama laû̌ nu, thayû̌ taihtan ba thǎ nè.

Beǐ cī phānphi takrau tayaò̌ htaû̌, alaô̌htan mwaǐ tasaikwan aphon pǔphon mwaǐ pa Kayǎnphao lahan nulè̌, pǔpra khan thwî, khan sû̌, khan thû̌ khan myû̌n dò saipaǐhtan bloncǔ kǎru swî̌lǎn khû̌cû̌ lahan nu, pa thei ba hô̌. Cwaǐdò pǔru pǔkhan aò , pa Kayǎnphao lahan, dô̌ tatheingǎ aò taò̌ akaǔ pa saipaǐ bloncǔ kǎrǔ swî̌lǎn lahan dò cīánáshyin hô̌. Pa Kayǎnphao lahan tarwaǐlaikhlai adaukhlô̌n mè, cīánáshyin tama dò ánáshyin pǔraû̌ ka htǔmǎ, swî̌lǎn khû̌cû̌ tanaû̌ ba cwaǐcǔ dò thanǎn ta-u tapaô̌taò̌ khau  kanaû̌ ba, tamahtan federal Democreci sû̌kǎnblon nǎnkhû̌, pa ka malaileǐn taû̌ dô̌ htaû̌ mò̌ nu, taihtan ba dò paô̌syûn dahtòn thanaò bloncǔ Kayǎnphao mô̌nnû (23) blan ka ǔ.