ယာယီအပစ်အခတ်ရပ်စဲကြောင်း ကြေညာပြီးနောက် အကြမ်းဖက်စစ်အုပ်စုက လေကြောင်း နှင့် လက်နက်ကြီးဖြင့် တိုက်ခိုက်ခြင်းနှင့် ပတ်သက်သည့် ထုတ်ပြန်ကြေညာချက်

ပြည်ထောင်စုသမ္မတမြန်မာနိုင်ငံတော်

အမျိုးသားညီညွတ်ရေးအစိုးရ

လူ့အခွင့်အရေးဆိုင်ရာဝန်ကြီးဌာန

ထုတ်ပြန်ကြေညာချက်အမှတ် (၂ /၂၀၂၅)

၁၃၈၆ ခုနှစ်၊ တန်ခူးလဆန်း ၈ ရက်

(၂၀၂၅ ခုနှစ်၊ ဧပြီလ ၅ ရက်)

ယာယီအပစ်အခတ်ရပ်စဲကြောင်း ကြေညာပြီးနောက် အကြမ်းဖက်စစ်အုပ်စုက လေကြောင်း နှင့် လက်နက်ကြီးဖြင့် တိုက်ခိုက်ခြင်းနှင့် ပတ်သက်သည့် ထုတ်ပြန်ကြေညာချက်

၁။ အကြမ်းဖက်စစ်အုပ်စုသည် ၂၀၂၅ ခုနှစ်၊ ဧပြီလ (၂) ရက်နေ့တွင် ငလျင်ဒဏ် ပြန်လည် ထူထောင်ရေး ရက် (၂၀) ကြာ ယာယီအပစ်အခတ် ရပ်စဲကြောင်း ကြေညာပြီး နောက်တနေ့တွင်ပင် ကချင်ပြည်နယ်၊ ဗန်းမော်မြို့နယ်ကို နံနက် (၈း၅၆) နာရီ တွင် တကြိမ်၊ စစ်ကိုင်းတိုင်း၊ ဟုမ္မလင်းမြို့နယ်၊ တနိုင်းရွာကို နံနက် (၁၀) နာရီခန့် တွင် တကြိမ် လေကြောင်းမှ တိုက်ခိုက် ခဲ့သည်။

၂။ ၂၀၂၅ ခုနှစ်၊ မတ်လ (၂၈) ရက်နေ့တွင် ဖြစ်ပွားခဲ့သော အင်အားအလွန်ပြင်းထန်သည့် မြေငလျင်ဘေးဒဏ်ကို ကြုံတွေ့နေရပြီးနောက်ပိုင်း တပတ်အတွင်း အကြမ်းဖက်စစ်အုပ်စု သည် လေကြောင်း နှင့် လက်နက်ကြီးဖြင့် တိုက်ခိုက်မှုစုစုပေါင်း (၆၃) ကြိမ် ပြုလုပ်ခဲ့ရာ ကလေးငယ် (၁) ဦး၊ အမျိုးသမီး (၁၅) ဦးအပါအဝင် အရပ်သားပြည်သူ (၆၈)ဦး အသက်ဆုံးရှုံးခဲ့ရသည်။ ထိုသို့ တိုက်ခိုက်မှုများတွင် ငလျင်ဘေးဒဏ်ကို အဆိုးဝါးဆုံး ခံစားခဲ့ရသည့် စစ်ကိုင်းတိုင်းအတွင်း တိုက်ခိုက်မှု (၁၃) ကြိမ်နှင့် မန္တလေးတိုင်းအတွင်း (၈) ကြိမ် ပါဝင်ခဲ့သည်။ ထို့ပြင် အကြမ်းဖက် စစ်အုပ်စုသည် ၂၀၂၅ ခုနှစ်၊ ဧပြီလ (၃) ရက်နေ့တွင် မန္တလေးတိုင်း၊ ညောင်ဦးမြို့နယ်အတွင်း မြေပြင်စစ်ကြောင်းများမှတဆင့် ထိုးစစ်ဆင်မှုများ ပြုလုပ်နေဆဲ ဖြစ်သဖြင့် ကျေးရွာ (၆) ရွာအတွင်းရှိ အရပ်သားပြည်သူများ နေရပ်စွန့်ခွာ တိမ်းရှောင် နေရသည်။

၃။ မြန်မာနိုင်ငံအနှံ့အပြားတွင် ဆိုးရွားသည့်နိုင်ငံတကာရာဇဝတ်မှုများတွက် ဖြစ်သော လူမျိုးသုဉ်း သတ်ဖြတ်မှု၊ စစ်ရာဇဝတ်မှု၊ လူသားမျိုးနွယ်အပေါ်ကျူးလွန်သည့် ရာဇဝတ်မှုများကို စနစ်တကျနှင့် ကျယ်ကျယ်ပြန့်ပြန့် ကျူးလွန်နေသော အကြမ်းဖက် စစ်အုပ်စုသည် ပြင်းထန်သည့် လူသားချင်းစာနာထောက်ထားမှု အကြပ်အတည်းကို ရင်ဆိုင်နေရသည့် ယခုလိုအချိန်တွင်ပင် ဆက်လက် ကျူးလွန်လျက် ရှိသည်။

၄။ အကြမ်းဖက်စစ်အုပ်စု၏ ရက်စက်ကြမ်းကြုတ်လှသည့် ရာဇဝတ်မှုများအတွက် တာဝန်ခံစေမှုများ အမြန်ဆုံးပေါ်ထွန်းလာစေရန်အတွက် နိုင်ငံတကာက ဝိုင်းဝန်းကြိုးပမ်း အားထုတ်ပေးကြရန် တောင်းဆိုအပ်ပါသည်။ ကုလသမဂ္ဂအပါအဝင် နိုင်ငံတကာ အစိုးရများ၊ အဖွဲ့အစည်းများအနေဖြင့် ငလျင်ဘေးဒဏ်သင့် ပြည်သူများအတွက် အရေးပေါ် အကူအညီများ ကူညီရာတွင် အကြမ်းဖက် စစ်အုပ်စုမှတဆင့် တိုက်ရိုက် ကူညီခြင်းမပြုဘဲ အရပ်ဘက်အဖွဲ့အစည်းများမှတဆင့်၊ တော်လှန်ရေးအင်အားစုများ မှတဆင့် နည်းလမ်းများကို ဖော်ထုတ်၍ ငလျင်ဘေးဒဏ်သင့်ပြည်သူများကို ထောက်ပံ့ ကူညီမှုများ ပြုလုပ်ပေးနိုင်ကြပါရန် တောင်းဆိုအပ်ပါသည်။

လူ့အခွင့်အရေးဆိုင်ရာဝန်ကြီးဌာန

အမျိုးသားညီညွတ်ရေးအစိုးရ